Orientalsk burger

Burger blir nok ofte rekna for å vere ganske usunt, i alle fall om ein kjøper den på ein snarmatrestaurant. Lagar ein burger frå grunnen sjølv, har ein meir kontroll på innhaldet.

Til fire burgerar treng ein;

ca. 500 g karbonadedeig
1 liten raudlauk, riven
2-4 kvitlauksfedd, riven
2 ts garam masala
1 ts salt
ca. 1/2 ts svart pepar
olje

salatblad
tomatskiver
raudlaukringar
burgerbrød
ketsjup og sennep

Bland saman karbonadedeig, riven lauk og kvitlauk, garam masala, salt og pepar til ei seig farse. Ta litt vatn på ei fjøl og på hendene og form fire jamne bollar. Trykk bollane flate. Det kan vere lurt å klappe burgerane ganske flate, sidan dei veks litt i høgda når ein steiker dei.

Varm olje i ei steikepanne, og brun burgerane på begge sider, omlag 3-5 minutt på kvar side.

Lag til burgerbrød med salat, tomat og laukringar og burger.

Burgerane som blir til overs kan godt frysast. 

Vel bekome!

Fiskesuppe med litt ekstra

Fiskesuppe er gjerne litt meir mat i enn andre supper. Dvs. det kjem an på kor mykje ein puttar i. Sjølv er eg ikkje så glad i fiskesuppe av posevarianten, men kjøper gjerne den varianten ein finn i frysedisken. Den har som regel litt fisk og grønsaker i, og ein treng berre å tilsette litt væske. Denne oppskrifta har litt meir enn det som følgjer med i pakken.

Til ein middagsporsjon treng ein;

1 pk frosen fiskesuppe

1 beger créme fraîche (ikkje lettvarianten)

2 dl lapskausblanding

1/2 boks reker eller skaldyrblanding

godt brød

Ta opp fiskesuppa litt før du skal lage den, så den får tint, ev. tin den litt i mikrobølgeomnen. Ha suppa i ei gryte. Følg instruksjonane på pakken, men erstatt mjølk med créme fraîche (då blir suppa meir fyldig). Gi eit oppkok under omrøring, ha i lapskausblanding og la putre til denne er gjennomkokt.

Rett før servering ha i reker eller skaldyrblanding. Dette skal berre bli gjennomvarm, blir det kokt lenge får rekene ein viskelæraktig konsistens.

Server med godt brød til eller flatbrød.

Vel bekome!

Dampa blåskjell

Om sommaren er det ofte eg ikkje gidd å lage middag, men tek noko enkelt. Då er sjømat godt, og då særleg blåskjell. Det er vel ein tommelfingerregel som seier at blåskjell skal etast i månadar med R i, men eg kjenner meg trygg når eg kjøper blåskjell i fiskedisken på butikken. Reknar med at dei då har vore testa:)

Til ein middagsporsjon treng ein;
1 nett blåskjell
ca. 2 glas kvitvin (ev. cider)
2 sjalottlauk
2-4 kvitlauksfedd
eit knippe dill

brød

Før ein dampar blåskjell må dei sorterast og vaskast først. Daude blåskjell må kastast. For å sjå korleis ein best førebur blåskjella, sjekk ut denne videoen http://www.youtube.com/watch?v=uttfm2dbHeM (engelsk).

Grovhakk lauk og kvitlauk, riv dill i mindre bitar. Ha dette i ei gryte og hell over kvitvin. Legg på lôk og kok opp. Hell i blåskjella når det kokar i gryta. Legg på lôk att og senk varmen litt og la dampe i 5-7 minutt til blåskjella opnar seg. Rist i gryta av og til.

Før ein serverer blåskjella fjern dei blåskjella som ikkje er skikkeleg opna. Dei kan vere dårlege.

Server med godt brød til, t.d. kvitlauksbrød, pariserloff eller anna småbrød.

Vel bekome!

Curry

Dette er for så vidt ikkje ei oppskrift, sidan eg brukar saus frå glas. Litt av grunnen til det er at det er frykteleg mange ingrediensar om ein skal lage curry frå byrjinga. Og så er jo glas lettvint:)

Til 1 porsjon treng ein;

200-250 g kjøt (t.d. kylling, lam, svin), i strimlar
olje
1 glas currysaus
1 1/2 dl ris (jasmin eller basmati)
naanbrød

Brun kjøtet først til det er jamt steikt i litt olje. Eg brukte ein type Rogaan Josh saus på glas som har krydderblanding separat i lôket. Då surrar ein kjøtet nokre minutt i krydderblandinga før ein har sausen over og let det putre i nokre minutt.

Kok risen etter instruksane på pakken. Varm naanbrødet

Server curry'en på ris og med naanbrød.

Vel bekome!

Kokt makrell med agurksalat

Makrell høyrer sommaren til, då gjer det heller ikkje noko at den er kjempebilleg i ferskvaredisken. Makrell er ein feit fisketype som er full av omega, som seiast å vere sunt. Men ein må vere litt obs på at denne er mektig, så ein blir fort mett.

Til ein porsjon treng ei;
1 stor eller 2 små makrellar
1 1/2 l vatn
3/4 dl salt
7-8 svarte peparkorn
2 små laurbærblad

1/3 agurk
2 ss 7% eddik
1 ss sukker
1/2 dl vatn

2-3 kokte poteter
rømme

Lag agurksalaten først så den får stå å trekke, omlag 30 minutt. Rør ut sukker og eddik i ei glasskål og ha på vatn. Smak til, og juster med ev. meir sukker eller eddik til passe sur-søt. Ha i agurkskiver.

Makrellen er som regel ikkje reinska så det må ein gjere. Det gjer ein ved å skjere eit snitt frå tarmopningen og fram til hovudet. Del av hovudet bak finnane, og ta ut all innmaten. Vask fisken godt inni buken under rennande vatn slik at alt blodet og dei svarte hinnene blir vaska vekk. Del fisken i 3-4 serveringsstykker og kast sporden.

Kok opp vatnet med salt, peparkorn og laurbærblad (ein kan også ha i litt sitron, men då må ein bruke stålpanne/non-stick) til saltet er oppløyst. Ha fisken i og la trekke i 10 minutt (til fisken blir kvit, og skinnet byrjar å løysne).

Server markellen med agurksalat, rømme og kokte nypoteter.

Makrell går fint å steike også, men då lagar ein filetar (sjå video: http://www.youtube.com/watch?v=gqut_esVo7U (engelsk). Det kan vere lurt å vende dei i steikemjøl før ein brunar dei 2-3 minutt på kvar side. Fordelen med store makrellar er at det er lett å finne beina, men kjøtet kan vere litt grovt. Fordelen med små makrellar er at kjøtet er delikat, men det kan vere litt jobb med å fjerne beina. Likar ein ikkje makrell kan ein bruke laks eller aure.

Vel bekome!

Rekesmørbrød

Det blir ikkje riktig sommar utan reker og anna sjømat. Rett nok er kanskje ikkje rekesmørbrød for middag å rekne, men et ein 3-4 stykker blir ein i alle fall mett!

Til 3-4 rekesmørbrød treng ein;
omlag 1 kg frosne reker, tina og renska
loff
majones (vanleg, kvitlauk eller sitron)
sitronbåtar

Fordel rekene utover eit fat for å tine dei. Har eg mykje reker brukar eg ofte langpanne. Rensk rekene og sett dei kaldt om du ikkje skal ete dei med ein gong. Kast reker som ser suspekte ut.

Skjer loff i skiver, ha på margarin og majones. Legg på masse reker. Så er det berre å lange innpå!

Reker held seg i kjøleskap til dagen etterpå, men bør ikkje stå for lenge. Dei skal lukte friskt av hav.

Vel bekome!

Gratinert fisk

Fisk er som nemnt i tidlegare innlegg både rimeleg og enkelt å lage, det er heller ingen bakdel at det er sunt. Det er også enkelt å variere. Denne varianten er med ost, noko som kanskje høyrest rart ut til fisk. Men det funkar:)

Til ein porsjon treng ein;
1-2 porsjonsstykke skinn- og beinfri lyrfilet (eller anna kvit fiskefilet)
1 lita gulrot
1/4 squash
1/2 raudlauk
salt og pepar
margarin
riven ost

Smør ei eldfast form med litt margarin. Dryss litt salt og pepar i botn. Legg fiskestykkene oppå, og dryss på salt og pepar.

Om ein har food processor eller eit rivgjern kan ein skive grønsakene på den. Skjer ein skiver for hand, må desse vere tynne. Legg først gulrøtene på fisken, og krydre litt, legg så squash på og krydre. Til slutt legg ein lauken oppå og dryssar på ost.

Gratiner forma i omn på 200 grader i 20-30 minutt. Sjekk med kniv om det er motstand eller ikkje, for å kjenne om retten er ferdig.

Server med potet, pasta eller brød, og ev. ein grøn salat. Eg prøvde denne gongen med potetskiver i lag med grønsakene, men det fungerte ikkje så godt, dei vart ikkje "gjennomkokt".

Vel bekome!

Svinepytt

Sjølv om det er lettvint å kjøpe frossen pytt i panne, er det også ganske greitt å lage sjølv frå byrjinga. Då har ein også betre kontroll på kva som er oppi. Sunnare er det også:)

Til ein porsjon treng ein;
150-200 g svineflatbiff, strimla
1/2 liten squash, i terningar
1/2 raud paprika, iterningar
1/2 raudlauk, i terningar
1 raud chili, utan frø, finhakka
1-2 kvitlauksfedd, finhakka
1 tomat, i terningar
olje
salt og pepar
1 porsjon ris

Brun svinekjøtet i litt olje, krydre med salt og pepar. Ha i lauk, squash, kvitlauk og chili og surr mjukt på medium varme. Ha i paprika og tomat og la bli gjennomvarmt. Krydre med salt og pepar til det er passeleg krydra.

Kok risen etter instruksane på pakken.

Ein kan sjølvsagt bruke andre grønsaker om ein vil alt ettersom kva ein likar og kva som er best i butikken. Ein kan bruke sopp, sukkererter, minimais, brokkoli og blomkål, det er berre fantasien som set stoppar:) Ein kan sjølvsagt bytte ut risen med poteter (då gjerne kokt frå før), potetmos eller pasta. Det er også godt med salat til.

Vel bekome!

Steikt laks

Steikt laks er god, sunn og rimeleg middag. Eg kjøper anten laks i ferskvaredisken når det er tilbod, eller slike frosne "strips" med porsjonsstykker. Så lenge laksen er beinfri kan ein bruke den til mykje ulikt. Her har eg valt å steike den, men foliebakt eller grilla laks er også kjempegodt.

Til ein porsjon steikt laks;

1-2 stykker laksefilet, beinfri
5-6 asparges
2-3 poteter
margarin
rømme
salt og pepar

Skyll av fisken under kaldt vatn og tørk av med kjøkkenpapir. Krydre med salt og svart pepar. Bøy aspargesen til den knekker, spar toppen og kast den enden som knakk av. Skrell poteter og kok dei.

Aspargesen blir veldig god om ein dampar den. Då legg ein ei damperist i botn av ei panne, har på litt vatn og kokar opp. Legg aspargesen oppi og ein liten klatt margarin. Legg på lôk og senk varmen til middels.

Smelt litt margarin i ei steikepanne og steik laksen først med skinnsida ned på middels varme, snu etter 2-3 minutt. Steik til laksen er ferdig, omlag 5-6 minutt. Ein kan ev. legge på eit lôk og senk varmen.

Server med rømme til.

Ein kan bruke brokkoli eller salat til, om ein ikkje vil ha asparges.

Vel bekome!

Pasta med kjøtbollar

Kjøtbollar er godt, og det ganske enkelt å lage dei sjølv. Når eg først lagar kjøtbollar frå starten, brukar eg å lage meir enn eg treng til ein middag. Dei er nemleg kjekke å ha på lur i frysen. Eg brukar som regel pastasaus frå glas fordi det er enkelt og fordi det smakar ganske godt, men det er ingenting i vegen for å lage sausen frå starten av også. Kjøtbollane er i tillegg kjempegode til tapas :)

Til kjøtbollar treng ein;

1 liten raudlauk, riven
400 g karbonadedeig (eller kjøtdeig)
1 egg
2-3 kvitlauksfedd, finhakka
1 raud chili (utan frø), finhakka
ca. 1 ts salt
1/4 ts pepar
margarin

1 glas pastasaus
1 porsjon pasta (t.d. skruer)
riven parmesan

Ha lauk, kvitlauk og chili i ein food processor og køyr til grønsakene er finhakka (eller finhakk dei godt). Ha i karbonadedeig (kjøtdeig) og køyr slik at det samlar seg litt. Ha i salt og pepar og køyr til ei seig deig. Ha i egg og køyr så det får blanda seg godt. Du kan gjere alt dette for hand om ein ikkje har food processor, men det tek litt lenger tid.

Form små kjøtbollar og steik dei i litt margarin. Ein kan godt koke dei kjøtbollane ein ikkje skal ete med ein gong i litt buljong, eller steike dei ferdig på steikepanna etter at ein har bruna alle kjøtbollane.

Kok opp pastasausen og ha kjøtbollar i. Senk varmen og la kjøtbollane trekke i sausen til dei er gjennomkokt. Kok pastaen etter instruksane på pakken. Vend den kokte pastaen ned i pastasausen og kjøtbollane.

Server pasta med kjøtbollar i ein djup tallerken med mykje parmesanost på.

Vel bekome!

Risengrynsgraut

Risengrynsgraut er ein helgeklassikar, og sjølv om det finnast snarvariantar av graut er graut laga frå grunnen av absolutt best. Det er også godt mogleg å lage graut til ein person, men lagar ein først graut kan ein lage litt ekstra. Då kan ein ha riskrem til dessert dagen etterpå, eller lage rislappar av den.

Til risengrynsgraut treng ein;
1 dl grautris per person
dobbelt så mykje vatn som ris
1/2 l H-mjølk per dl ris
litt salt og sukker

kanel
sukker
smørauge
spekepølse/spekemat
raud saft

Ha grautris og vatn i ei gryte og kok opp utan lôk til vatnet er kokt inn. Ha på mjølk og kok opp under opprøring. Senk varmen til lav, det skal så vidt putre litt. Ha i litt salt og sukker. Rør av og til så grauten ikkje svir seg. Den kan godt putre under lôk. Grauten er ferdig etter omlag ein time, eller når den er passe tjukk.

Det kan vere lurt å bruke ei gryte med non-stick belegg då reduserer ein faren for at det svir seg. Aluminiumsgryte går også fint, men stålpanner til mjølkebasert mat fører ofte til meir oppvask enn ein hadde tenkt og ein øydelagd middag.

Elles tilrår eg å bruke H-mjølk sjølv om ein ikkje drikk det til vanleg. Brukar ein lett mjølk blir grauten fort tam på smak, og vil kanskje ikkje tjukne skikkeleg.

Vel bekome!

Lyr i rømmesaus

Fisk er ei god råvare som ikkje treng å koste altfor mykje når ein skal lage til ein porsjon. Mange ferskvarediskar har også gode tilbod på fisk. Til denne retten kan ein i grunn bruke det meste av kvit fast fisk, så det er berre å velje den fisken som er rimelegast.

Til ein (stor) porsjon treng ein;
1 liten skinn- og beinfri lyrfilet (omlag 200-250 g)
3 ss kveitemjøl
litt salt og pepar
2-3 ss margarin
ca. 5 dl vatn
3-4 ss lettrømme
sukkerkulør

kokt potet
raspa gulrot

Ha kveitemjøl, salt og pepar i ein brødpose og rist godt. Del fiskefileten i passe stykker, og fjern ev. bein. Ha fisken i posen og rist godt så stykkene blir godt dekt.

Smelt 2 ss margarin i ei steikepanne. Brun fisken på begge sider, løft stykkene ut og sett til side. Smelt resten av margarinet og ha på 2-3 ss av steikemjølet (samme som ein vendte fisken i). Rør det godt i med ein visp. Spe med vatn og rør godt så klumpane løyser seg opp. Det skal vere ein ganske tjukk saus. Rør ut rømmen i sausen og la den putre på svak varme til den blir ganske tjukk. Ha i nokre dråpar sukkerkulør slik at sausen får ein lysebrun farge. Smak til med meir salt og pepar om det trengst.

Ha fisken tilbake i sausen og la den putre under lôk til fisken er gjennomkokt. Server med kokte poteter og raspa gulrot eller råkostsalat.

Vel bekome!

P.S. Det er lov å knuse potetene i sausen:)

Risotto med kylling og asparges

Risotto er ein klassikar som er lett å lage til ein (eller fleire). Den er lett å variere, frå rein vegetar når det er ferske kantarellar i skogen, til skaldyr og kylling. Skal ein lage risotto slik som italienarane likar den skal den vere al dente (med hard kjerne), men eg lagar den som regel "feil" og lar risen koke heilt gjennom. Eg syns den er best slik:)

Til ein porsjon risotto treng ein;
litt olje eller margarin
1 kyllingfilet, i små terningar
5 cm purrelauk, finhakka
1 fedd kvitlauk, finhakka
1-2 østerssopp eller sjampinjong, i små terningar
5-6 asparges, snitta på skrå
1 dl risottoris
1 glas kvitvin (kan erstattast med kraft)
ca. 5 dl hønsekraft/grønsakskraft (ev. buljong med lavt saltinnhald)
1 neve riven parmesan
salt og pepar

Brun kyllingen raskt i ei gryte med litt olje i, ha i soppen når kyllingen har fått steikeskorpe. Ta ut  kylling og sopp og sett til side. Ha litt olje i gryta og surr purre og kvitlauk blank. Ha i risottoris og surr til den blir gyllen og gjennomsiktig langs kantane. Ha på vin og la det koke til den er trekt inn i risen. Kok opp krafta og la aspargesen trekke til den blir møyr. Løft den ut og sett tilside.  Spe risottoen med litt og litt kraft (ca. 1 dl), la krafta trekke inn for kvar nye ause med kraft. Smak om den er al dente eller kokt gjennom. Smak til med salt og pepar. Rør i 2/3 av parmesanosten, vend i kylling og sopp og asparges. Dryss resten av parmesanen over før servering.

Brukar ein vanleg buljongterning, blir risottoen fort veldig salt på smaken. Difor er det lurt å anten bruke heimelaga kraft, eller konsentrert kraft på flaske (fond) med lite saltinnhald.

Vel bekome!

Suppelapskaus

Heimelaga lapskaus er ein god og varmande rett, men er kanskje ikkje det ei lagar til ein porsjon. Likevel er det godt på ein kald dag, så snar-varianten er nesten like god: )

Til ein stor porsjon suppelapskaus treng ein;
1/2 pose frosen lapskausblanding
ca. 1 l vatn
1-2 ss buljongpulver eller suppebuljong
2-3 røkte skinnfrie pølser, i terningar
svart pepar

Ha lapskausblanding i ei gryte, hell på nok vatn til det dekker godt. Ha i buljongpulver og pølsebitar. Kok opp og la putre på svak varme i 10 minutt eller til grønsakene er møyre. Smak til med svart pepar.

Vil ein ha kjøt i staden for pølser, kan ein godt bruke litt fårekjøt, grytekjøt av svin eller storfe, men dette må koke ca. 20-30 minutt før ein har i grønsakene.

Server med rundstykker eller flatbrød til.

Denne oppskrifta er nok til to personar, eller til ein person to dagar.

Vel bekome!

Teriyakiwok

Wok er ein grei måte å lage sunn mat på utan at det treng å ta lang tid. Ein brukar få og friske ingrediensar og kan variere mykje. Og ein kan lage den så mild eller så sterk ein vil.

Til woken treng ein;

1 liten mørbradbiff (storfe), i tynne skiver

5 cm squash, i tynne terningar

2-3 vårlauk, hakka

1/2 liten raud paprika, i terningar

2-3 sopp, i skiver

1 neve brokkolibukettar (del dei store i to eller fire)

olje

1-2 ss maizenna (valfritt)

1/2 glas teryiakisaus (eller 1 pose ferdig woksaus)

1-1 1/2 dl jasminris

2-3 dl vatn 

ei klype salt

Ha ris, vatn og litt salt i ei panne. Ha på lôk og kok opp. Senk varmen og la risen trekke til den er ferdig (omlag 15 minutt). 

Varm woken godt og ha i olje. Vend biffskivene i maizenna, rist av overflødig maizenna. Brun biffskivene raskt på begge sider. Løft den ut og sett til side. Ha i meir olje og varm opp. Wok grønsakene raskt, ha biffskivene tilbake i woken. Ha på saus og vend godt. 

Server woken oppå risen. 

Grunnen til at ein vender kjøtet i maizenna er at det då får ei sprø hinne. Lagar ein woksaus med soyasaus brukar ein gjerne resten av maizennaen utrørt i vatn til å tjukne sausen. Men det treng ein ikkje å gjere når ein brukar ferdig-saus frå glas eller pose. Ønskjer ein litt sterkare wok kan ein ha i ein finhakka chili. Det går også fint an å bruke kylling eller svinekjøt i staden for storfe, eller berre grønsaker for ein vegetarvariant. 

Vel bekome!

Steikt ris

Steikt ris er ein av mine favorittar når eg bestiller kinesisk hentemat, men det er ganske enkelt å lage sjølv. Eg brukar ofte å koke meir ris enn eg treng til ein middagsrett, nettopp for å lage steikt ris.

Til steikt ris treng du;
ei porsjon kokt ris (t.d. jasminris)
2-3 ss maiskorn
1 liten purre, hakka
1/2 paprika, i terningar
1-2 kvitlauksfedd, finhakka
1 lita gulrot, raspa
1/3 boks bogskinke, i terningar (1 steikt kyllingfilet, i terningar, 1 liten biff, i terningar eller 1/2 boks reker på boks)
1 egg
litt olje
soyasaus
litt sesamolje

Pisk egget og steik eggerøre i woken (det kan vere lurt å ha litt olje i). Ta ut eggerøra og legg på eit fat, hakk i mindre bitar med ein kniv. Tørk wok'en med eit kjøkkenpapir. Varm litt olje, surr kvitlauk, purre og gulrot til det blir blankt. Ha i risen, og rør den godt rundt (den skal ikkje vere klumpete). Ha i bogskinke (eller kylling, biff eller reker), mais og paprika til det blir gjennomvarmt. Rør i egget. Drisle på litt soyasaus og sesamolje (nokre få dråpar) og rør godt.

Det går godt an å bruke andre grønsaker som t.d. hakka sopp, chili, riven squash, bønnespirer. Likar ein ikkje soyasaus kan ein godt smake til med salt og pepar, men då blir det ikkje heilt "kinesisk".

Vel bekome!

Foliebakt fisk

Å bake fisk i folie er ein rask måte og lage til små porsjonar fisk på. Sjølvsagt kan ein lage det til fleire, då er det greitt å lage individuelle pakkar. Alle typar fersk fiskefilet kan brukast saman med grønsaker og anna godt.

Til ein porsjon treng du;
ca. 300 g fiskefilet (denne gongen brukte eg lyr)
1 liten purre eller 2-3 vårlauk, i ringar
5-6 friske grøne asparges
ca. 1 ss margarin
ein liten skvett kvitvin
salt og pepar

Saltkokte poteter:
160 g amadinepoteter (eller andre tapaspoteter/små norske nypoteter)
160 g havsalt
3,2 dl vatn

Lag til eit stykke aluminiumsfolie stort nok til å brette over fisken for å lage ein konvolutt. Legg det på eit bakebrett. Først legg ein asparges og purre på folien. Bøy aspargesen slik at den bryt, kast den nederste delen, den er for grov til å etast. Vask aspargesen, og del den i to på langs viss den er litt tjukk. Ha purre over og litt salt og pepar. Fjern skinn om fisken har det, og bein. Del fisken i passelege serveringsstykke. Krydre med salt og pepar på begge sider. Legg fisken oppå grønsakene, ha på litt margarin og brett aluminiumsfolien som ein konvolutt, med ei side open. Hell vin inn i konvolutten og lukk att.  Ein kan også bruke eldfast form med aluminiumsfolie over, eller med lôk på.

Bakast i omn ved 225 grader i 20-30 minutt alt etter kor store fiskestykkene er. Det kan vere lurt å opne ein pakke for å sjekke om fisken er ferdig. Det gjer ein ved å sjå om fisken deler seg i skiver ved å "pirke" borti med ein kniv.

Til potetene kokar ein opp havsalt og vatn til saltet er oppløyst. Legg potetene oppi (skrubb dei godt først for skalet skal vere på). og kok til dei er gjennomkokt. Hell av vatnet og la potetene dampe. Dei skal ha eit kvitt og innskrumpa skal når dei er ferdige.

Server fisk, grønsaker og poteter med sjy frå fisken over. Det går fint an å ha andre grønsaker i folien alt etter kva ein har eller har lyst på. Ein kan til dømes ha finsnitta gulrotskiver, små brokkolibukettar, sukkererter, paprikastrimlar, finsnitta raudlauk og sitronskiver. Dill er også godt saman med særleg laks. Ein kan også ha tynne potetskiver i, om ein kokar dei litt på førehand. Då lagar ein minimalt med oppvask:) Elles kan ein droppe kvitvin, og berre ha margarin eller olje i. Fisken og grønsakene lagar uansett god sjy.

Vel bekome!

Pølsegrateng

Pølsegrateng er ein veldig grei måte å bruke opp restar på. Ein tek eigentleg det ein har av restar og vender dei i kvit saus og har pasta i. Ein kan godt bruke skinke, restar av steik, fisk eller berre grønsaker i staden for pølser.

Til ei lita form treng ein:
2-4 pølser, i bitar (t.d. grillpølser)
1/2 liten purre, finhakka
2 ss margarin
2 ss kveitemjøl
ca. 1/2 l mjølk
nokre nevar pasta
grønsaker, i bitar
kvit ost
salt og pepar

Smelt margarin i ei non-stick gryte og surr purrelauken blank. Dryss på mjøl og rør godt inn i margarinen. Spe med mjølk og rør godt mellom kvar speing. La sausen putre til mjølsmaken er kokt ut, rør av og til. Smak til med salt og pepar. Det kan vere lurt å krydre litt meir enn ein ville gjort om ein laga kvit saus til fisk. Ha i nokre skriver kvitost og la den smelte. Sausen bør vere ganske tjukk.

Rist pølsebitane i ei tørr steikepanne til dei er begynt og bli litt brune. Om ein brukar rå grønsaker bør dei kokast litt på førehand. Brukar ein grønsaksrestar, bør ein dele dei i mindre bitar. Ein kan også bruke frosne grønsaker, men då bør ein tine dei først og slå vekk tinevatnet.

Kok pasta som beskrive på pakken. Slå av vatnet. Vend pølser, pasta og grønsaker i sausen. Stuingen bør ikkje vere for blaut, det skal vere ganske mykje pølser og grønsaker og pasta i høve saus. Ha stuingen i ei smurd eldfast form. Ha ost på toppen og gratiner i omn til osten er gyllen. Har ein omn med gratineringsfunksjon brukar ein den, elles set ein omnen på 225 grader.

Server med grønsaker eller salat til, og godt brød.

Denne gratengen kan godt lagast til i førevegen, men då har ein ikkje ost på toppen før ein set den i omnen. Er forma kjøleskapskald, bør den setjast i romtemperatur ei stund før ein steikjer den. Set forma så i steikjeomn ved 170 grader i omlag 40 minutt, før ein har ost på og gratinerer ved 225 grader.

Vegetarwok

Wok er enkel og sunn mat, som er kjapp å lage. Lett å lage mindre porsjonar av også. Valmoglegheitene av ingrediensar er nesten uendelege. Ein vel det ein likar best. Denne wokoppskrifta er rein vegetar, men ønskjer ein det kan ein erstatte ein eller fleire av grønsakene med kylling, svinestrimlar, biff, skaldyr...

I denne oppskrifta brukte eg:
ei lita gulrot
1/3 squash
1/4 stor paprika
1/2 liten lauk
nokre brokkolibukettar
1-2 sopp
5-6 minimais, delt på langs og i to
2-3 kvitlauksfedd, finhakka
1 raud chili, utan frø, finhakka
1 neve bønnespirer
olje
1 "flak" tørre eggenudlar
soyasaus
sesamolje
1/2 lime
maizenna rørt ut i vatn (kan utelatast)

Del grønsakene i omlag like store bitar (t.d. lillefingerstorleik). Varm olje i ein wok, start med gulrot, lauk, kvitlauk og chili. La surre litt medan ein rører. Ha i sopp, squash og brokkoli og surr med til dei byrjar å få farge. Ha i minimais, paprika og bønnespirer og la bli varme.

Ha på soyasaus slik at det er litt i botn. Drisle på litt sesamolje (ver litt forsiktig, for sesamolja har mykje smak). Klem limesaft over. Jamn med maizenna utrørt i vatn til sausen tjuknar.

Kok nudlane som beskrive på pakken. Sil av vatnet og vend dei ned i woken, slik at dei blir dekte med saus.

Woken kan godt serverast med ris, om ein ikkje vil ha nudlar. Då serverer ein dei woka grønsakene oppå risen. Brukar ein frosne wokgrønsaker, kan det vere lurt å tine dei først, sidan dei inneheld ein del vatn. Då unngår ein at woken blir utvatna:)

Vel bekome!

Ein slags shepherd's pie



Shepherd's pie er eigentleg laga med lammekjøtdeig og brun saus. Eg brukar å lage den etter prinsippet man tager det man haver. Den fungerer også godt som restemiddag. Kjøtdeig er nok heller ikkje så sundt i lengda, men er jo snaut å bruke. Ein kan også bruke kyllingkjøtdeig eller svinekjøtdeig. Eller lage ein rein vegetarrett av den. Men uansett må ein ha potetmostopping på:)

Denne oppskrifta er til to personar, men kan lett lagast til ein.

Kjøttfyll;
1 pk kjøtdeig (400g)
1/2 lauk, finhakka
1 gulrot, i terningar
3-4 sopp, finhakka
1-2 kvitlauksfedd, finhakka
1 stor ss tomatpurè
1 boks hakka tomat
salt
pepar
pizzakrydder/oregano
sukker

Om ein likar det "hot" kan ein ha i ein finhakka chili. Om ein vil ha meir grønsaker i kan ein ha i 1/3 squash i terningar. Ein kan bruke andre grønsaker også, alt etter kva ein har for handa.

Potetmos;
6-7 medium poteter, skrella og i terningar (det går alltid med meir potet i potetmos, enn ein et av vanleg kokte)
ca. 1 ss flytande margarin
salt
pepar
mjølk

riven ost (valfritt)

Brun kjøtdeigen i ei gryte. Når den har fått litt farge, ha i alle grønsakene (utanom tomatar) og surr med til lauken byrjar å bli blank. Ha på tomatpurè og rør godt rundt. Ha deretter på hakka tomat. Dryss på pizzakrydder og la sausen putre til den byrjar å tjukne. Smak til med salt og pepar. Er det skarp tomatpurè-smak på sause, dryss i ei klype sukker. Ev. ha i meir pizzakrydder.

Kok potetterningane til potetmosen møyre, slå av vatnet og la dei dampe litt. Ha på margarin og mos potetene med ein potetmosar eller ein gaffel. Rør i mjølk til ein passe tjukk mos. Smak til med salt og pepar.

Smør ei eldfast form og fordel kjøtfyllet jamt i forma. Legg klattar med potetmos oppå fyllet. Potetmosen treng ikkje å dekke over alt, eller vere heilt glatt. Potetmosen blir sprøare og betre når det er toppar. Dryss på ost. Gratiner i omn ved 225 grader til osten og potetmosen er gyllen på toppen og fyllet boblar.

Server med salat og brød til.

Har ein restar etter t.d. spaghetti bolognaise eller ein annan kjøtsaus eller gryterett går det fint an å lage den til med potetmostopping. Då kan det vere lurt å varme oppatt restane i ei panne, eller steike den i omn på 175 grader i 20-30 minutt til den blir varm, før ein har på ost på potetmosen og aukar temperaturen til 225 grader. Det går også fint an å lage denne retten med potetmos frå pose. Kjøtsausen i denne oppskrifta kan også brukast til pasta.

Vel bekome!

Gratinerte pølser i brød

Gratinerte pølser i brød passar fint som laurdagskos eller som ein liten middagsrett. Passar også fint i barneselskap. Rett nok skal ein vel helst ikkje ete for mykje pølsemat, men vel ein magre pølser skulle vel det gå fint av og til. Er i alle fall veldig godt:). Kor mykje ein lagar til kjem an på kor svolten ein er eller kor mange som skal ha.

Til gratinerte pølser i brød treng ein;
Grillpølser (gjerne kyllinggrillpølser eller ein mager variant)
Pølsebrød (t.d. fiberrike pølsebrød)

Topping/"fyll";
Finhakka lauk eller vårlauk
Finhakka paprika
Mais
Salsa
Andre gode ting
Riven ost

Legg pølsene i pølsebrøda som dei er (har pølsene vore fryst, tine dei først). Sett pølsene i ei eldfast form. Dei bør stå tett i tett, så dei ikkje "kollapsar" under steiking. Ha på topping, t.d. lauk, paprika og mais eller berre salsa eller andre kombinasjonar ein likar. Dryss på riven ost. Steik i omn ved 225 grader til osten er gyllen på toppen. Brukar ein berre grantieringsfunksjon, blir gjerne osten gyllen før pølsene er gjennomvarme. Skjer med kniv mellom pølsene og rundt kanten på forma for å løsne pølsebrøda frå kvarandre. Server med ketsjup, sennep og anna pølse-i-brød tilbehøyr. For å gjere det sunnare kan ein ete salat til.

Vel bekome!